އަލިފާން ރޯވި ދޯނި އަޑިޔަށް ގޮސް ތަކެތި އޮޔާދާތީ ސަމާލުވާން އެދިއްޖެ

މިއަދު މެންދުރު ފަހު މާލެ އަތޮޅުތެރެއިން އަލިފާން ރޯވި ދޯނި އަޑިޔަށް ގޮސް ދޯންޏާއި ދޯނީގެ ބައެއް ބައިތަކާއި ތަކެތި އޮޔާދާތީ ދަތުރުކުރާ ފަރާތްތަކުން އެކަމަށް ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.

މިއަދު 14:55 ހާއިރު އަލިފާނުގެ ހާދިސާ ހިނގާފައި ވަނީ، "ފްރެޝް ފްރޮމް ދަ ސީ" ނަމަކަށް ކިޔާ ކަންކެލި މަސްވެރިކަން ކުރާ ދޯންޏެއްގައެވެ. އެދޯނި މިހާރު ވަނީ އަޑިޔަށް ގޮސްފައި ކަމަަށާޢި، ބައެއް ތަކެތި ކ.ދޫނިދޫގެ ހުޅަނގު އުތުރުން 0.38 ނޯޓިކަލް މޭލު ބޭރުން ދެކުނަށް އޮޔާދާތީ، އެސަރަހައްދުން ދަތުރުކުރައްވާ ފަރާތްތަކުން އެކަމަށް ސަމާލުވުމަށް އިިލްތިމާސްކުރައްވާކަމުގައި އެމްއެންޑީއެފުން ވަނީ ވިދާޅުވެފައެވެ.

އެ ދޯނީގައި ހިނގި އަލިފާނުގެ ހާދިސާ ހިނގި އިރު 15 މީހުން ތިއްބެވެ. އޭގެ ތެރެއިން 5 މީހަކަށް އެކިވަރުގެ އަނިޔާތައް ލިބިފައިވާ ކަމުގައި ފުލުހުން ވަނީ ވިދާޅުވެފައެވެ.

އަލިފާނުގެ ހާދިސާގައި އަނިޔާ ލިބުނު މީހުންނަށް މިއަދު ހަވީރު ވަނީ މާލެ ގެނެސް ފަރުވާދޭން ފަށާފައެވެ.