ވޯޓުލުމުގެ ވަގުތު 9:00 އާއި ހަމައަށް އިތުރުކޮށްފި

މިހާރު ކުރިޔަށްދާ އެމްޑީޕީގެ ޗެއާޕަރސަން ހޮވުމުގެ އިންތިޚާބުގައި، ވޯޓުލުމުގެ ވަގުތު މިރޭގެ 9:00 އާއި ހަމައަށް އިތުރުކޮށްފިއެވެ.

އެމްޑިޕީން ހާމަކޮށްފައިވާ ގޮތުގައި، ވޯޓުލުމުގެ ވަގުތު އިތުރުކުރީ، މޫސުން ގޯސްވެ ދަތިތަކެއް ދިމާވެ ބައެއް ފޮށިތަކުގެ ވޯޓުލުން ކުރިއަށް ގެންދިއުން ލަސްވުމާއި ގުޅިގެންނެވެ. އެންމެ ފުރަތަމަ ވޯޓުލުން ނިންމާ ގަޑިއެއްގެ ގޮތުގައި ހަމަޖައްސާފައި އޮތީ 8:30 އެވެ.

މިއަދު މެދުރާއްޖެ ތެރެއާއި ދެކުނުގެ އަތޮޅުތަކަށް ވަރަށް މޫސުމްގޯހެވެ. އަދި މޫސުމް ގޯސްވުމުގެ ސަބަބުން މޫސުމާއި ބެހޭ ޤައުމީ އިދާރާއިން މިއަދު ޔެލޯއެލާޓުވެސް ވަނީ ނެރެފައެވެ.

މިއިންތިޚާބުގައި ވޯޓުލުމަށް މުޅި ރާއްޖޭގައި، 240 ފޮށި އަދި ސްރީލަންކާގައި 1 ފޮއްޓާއި އެކު ޖުމުލަ 241 ފޮށި ވަނީ ބަހައްޓާފައެވެ. މިއިންތިޚާބުގައި އެމްޑީޕީގެ 50،176 މެމްބަރުންނަށް ވޯޓުދިނުމުގެ ޙައްޤުލިބިފައިވެއެވެ.