އިންޑިއާ އަސްކަރިއްޔާގެ މަތިންދާ ބޯޓެއް ވެއްޓި 5 މީހުން މަރުވެއްޖެ

އިންޑިއާގެ އަސްކަރީ މަތިންދާ ބޯޓެއް ވެއްޓި އޭގަތިބި އިންޑިއާ ވައިގެ ސިފައިންގެ 5 މީހުން މަރުވެއްޖެއެވެ.

އެންޑިޓީވީން ހާމަކޮށްފައިވާ ގޮތުގައި އެ ބޯޓު ވެއްޓިފައި ވަނީ، އާސާމްގެ ޖޯރްހަތްގައި އޮންނަ އިންޑިއާގެ އެއާބޭސްއަކަށް ޖައްސަން އުޅުމުގެ ތެރޭގައެވެ. ވެއްޓުނު ބޯޓަކީ، 'އެންޓޮނޯވް އެން-32' މަރުކާގެ މަތިންދާބޯޓެކެވެ. މިއީ ގަދަ ވިއްސާރައިގައިވެސް ދަތުރުކުރުމުގެ ޤާބިލްކަން ލިބިފައިވާ ބޯޓެކެވެ. މިބާވަތުގެ 100 ވުރެ ގިނަ ބޯޓު އިންޑިއާގެ ވައިގެ އަސްކަރިއްޔާގައި ބޭނުން ކުރެއެވެ.

މިހާދިސާގައި ވައިގެ ސިފައިންގެ 5 މީހުން މަރުވެފައިވާކަން އިންޑިއާގެ ވައިގެ އަސްކަރިއްޔާއިން ހާމަކޮށްފައި ވީނަމަވެސް އެމީހުންގެ ތަފްސީލެއް އަދި ބޯޓު ވެއްޓުނު އިރު އޭގައި ތިިބީ ކިތައް މީހުންކަމެއް ހާމަކޮށްފައެއް ނުވެއެވެ.

އިންޑިއާ ސަރުކާރުން ބުނެފައި ވަނީ އެ ހާދިސާ ތަޙްޤީޤު ކުރަމުން އަންނަ ކަމަށެވެ.