ރަސްފަންނަށް މޫދަށް އެރުން މަނާކޮށް އެ ބީޗު ބަންދުކޮށްފި

މާލޭގެ ރަސްފަންނަށް މޫދަށް އެރުން މަނާކޮށް މާލޭ ސިޓީ ކައުންސިލުން އެބީޗު ބަންދުކޮށްފިއެވެ.

މާލޭ ސިޓީކައުންސިލުން ހާމަކުރައްވާފައިވާ ގޮތުގައި، ރަސްފަންނަން މޫދަށް އެރުން މަނާކޮށް އެބީޗު ބަންދުކޮށްފައިވަނީ، ރޭ ގިނަ އަދަދެއްގެ ކަޅުތެޔޮ ރަސްފަންނުގެ ގޮނޑުދޮށަށް ލައްވުމާއި ގުޅިގެން އެބީޗުގެ މީދު ވަރަށް ބޮޑަށް ތަޣައްޔަރުވުމުންނެވެ.

އެހެންވެ ތެޔޮތައް ނަގައި ބީޗު ސާފުކުރުމުގެ މަސައްކަތް ކުރަން ޖެހޭތީ އެމަސައްކަތް ނިމެންދެން ވަގުތީ ގޮތުން އެތަން ބަންދުކުރީ ކަމުގައިވެސް މާލޭ ސިޓީކައުންސިލުން ވިދާޅުވެފައި ވެއެވެ.

ރަސްފަންނުގެ މޫދުތެރެއަށް ކަޅުތެޔޮ ވަދެ ތަޣައްޔަރުވުމުގެ މައްސަލައަކީ މީގެ ކުރިންވެސް ދިމާވަމުން އައި މައްސަލައެކެވެ. މިމައްސަލަ ދިމާވަނީ، މާލެ ކައިރީގައި އޮންނަ ބޯޓުފަހަރާއި ދޯނިތަކުން އިންޖީނުން ނަގާ ކަޅުތެޔޮތައް ކަނޑަށް އުކާލާތީއެވެ. މިމައްސަލަ ކުރިމަތި ވަމުން އަންނާނީ އެކަމާއި ގުޅިގެން އާއްމު ރައްޔިތުންވެސް އަންނަނީ ކަންބޮޑުވުން ފާޅުކުރަމުންނެވެ.